Фарғонада дарё бўйидан 50 килограммдан ортиқ гиёҳвандлик воситалари топилди
Ҳозирда гиёҳвандлик воситаларига алоқадор шахсларни аниқлаш чоралари кўрилмоқда.
Сирдарё дарёсининг Фарғона вилояти Бешариқ тумани ҳудудидан ўтувчи қисмида йирик миқдордаги гиёҳвандлик воситалари аниқланди. Бу ҳақда ДХХ маълум қилди.
Қайд этилишича, давлат чегарасини қўриқлаш ва унинг дахлсизлигини таъминлашга қаратилган тезкор-профилактик тадбирлар давомида Шодиқозиқ маҳалла фуқаролар йиғини ҳудудида дарё қирғоғида номаълум шахслар томонидан қолдириб кетилган полиэтилен қоплар топилган.
Қоплар холислар иштирокида кўздан кечирилганда, улар ичида қўшни давлатдан контрабанда йўли билан олиб кирилган гиёҳвандлик воситалари ва дори препаратлари борлиги аниқланган. Жумладан, жами 48 ўрамда 47 кг 113 грамм “гашиш”, 15 ўрамда 7 кг 779 грамм “опий”, шунингдек, 10 710 дона “Лидаза” ва 756 дона “Теноксикам” дори воситалари мусодара қилинган.
Мазкур ҳолат юзасидан Жиноят кодексининг 246-моддаси 2-қисми (контрабанда) билан жиноят иши қўзғатилди.
Ҳозирда тергов ҳаракатлари олиб борилмоқда, гиёҳвандлик воситаларига алоқадор шахсларни аниқлаш чоралари кўрилмоқда.
