Сирдарёда тақиқланган модда мавжуд оздирувчи қаҳвалар тўхтатиб қолинди
Ҳайдовчи мазкур маҳсулотларни 200 доллар эвазига божхонадан олиб ўтмоқчи бўлган.
Сирдарё вилоятида таркибида кучли таъсир қилувчи модда мавжуд бўлган биологик фаол қўшимчаларни ноқонуний олиб киришга уриниш ҳолати аниқланди. Бу ҳақда Божхона қўмитаси хабар берди.
Маълум қилинишича, “Малик” чегара божхона пости орқали мамлакат ҳудудига кириб келган фуқаро бошқарувидаги Lacetti русумли автомобиль белгиланган тартибда божхона назоратидан ўтказилган. Текширув жараёнида юклар орасида божхона назоратидан яширилган, 8 ва 10 граммли қадоқларда жойланган уч турдаги қаҳва маҳсулотлари аниқланган.
Экспертиза хулосасига кўра, жами 2258 дона ушбу маҳсулотлар таркибида Ўзбекистонда муомаласи чекланган “Сибутрамин” моддаси борлиги маълум бўлган. Дастлабки маълумотларга кўра, ҳайдовчи мазкур маҳсулотларни 200 АҚШ доллари эвазига божхонадан олиб ўтмоқчи бўлган.
Қонунчиликка мувофиқ, ушбу модданинг ҳатто оз миқдори ҳам жиноий жавобгарликка сабаб бўлиши мумкин.
Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
