Наманганда фуқароларни Ҳажга ноқонуний юбораётган шахс ушланди
У фуқаролардан Саудия Арабистонига юбориш эвазига пул талаб қилган.
Наманган вилоятида фуқароларни “Ҳаж-2026” мавсумига ноқонуний тарзда юборишни ваъда қилиб, пул талаб қилган шахс қўлга олинди. Бу ҳақда ДХХ хабар берди.
Маълум қилинишича, Наманган шаҳрида яшовчи, 1984 йилда туғилган шахс Чуст туманида истиқомат қилувчи тўрт нафар фуқарони “Ҳаж-2026” мавсумида Саудия Арабистонига юборишни ваъда қилиб, бунинг эвазига 26 минг АҚШ доллари талаб қилган.
Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбир давомида у сўралган маблағнинг 6 минг АҚШ долларини олган вақтида ашёвий далиллар билан ушланган.
Ҳолат юзасидан унга нисбатан Жиноят кодексининг 168-моддаси, 4-қисми “а” банди (фирибгарлик) билан жиноят иши қўзғатилиб, тергов ҳаракатлари олиб борилмоқда.
“Ҳаж” тадбири Ўзбекистон Республикаси Дин ишлари бўйича қўмитаси ва Саудия Арабистони Подшоҳлиги Ҳаж вазирлиги ўртасида ҳар йили имзоланадиган шартнома асосида Ўзбекистон мусулмонлари идораси томонидан амалга оширилади.
Маълумот учун, 18 апрелдан бошлаб Ҳаж визасига эга бўлган шахслардан ташқари, бошқа барча турдаги визага эга фуқароларнинг Маккага кириши ёки шаҳарда қолиши тақиқланади.
Шунингдек, 13 апрелдан эътиборан Маккага киришни истаган шахслар ваколатли органлардан расмий рухсатнома олиши лозим. Рухсатсиз шаҳарга киришга йўл қўйилмайди.
