Андижонда банк мансабдори 40 минг доллар пора билан ушланди
У кредит таъминоти учун гаровга қўйилган бинони тадбиркорга аукционсиз олиб бериш эвазига 90 минг доллар талаб қилган.
Андижон вилоятида банк тизимида фаолият юритган мансабдор шахс катта миқдорда пора олишда гумон қилиниб ушланди. Бу ҳақда ДХХ хабар берди.
Маълум қилинишича, Андижон вилоятидаги банклардан бирининг бош бошқармаси бошлиғи ўринбосари кредит таъминоти учун гаровга қўйилган мулкларни аукцион ва тўғридан-тўғри сотувга чиқариш ваколатига эга бўлгани ҳолда, хизмат мавқеидан фойдаланиб, шахсий бойлик орттирмоқчи бўлган.
У кредит таъминоти учун гаровга қўйилган, Асака туманида жойлашган, умумий баҳоси 16,8 млрд сўмлик хусусий даволаш марказининг 4 қаватли биноси аукцион савдо платформасида сотувдан қайтганлигидан фойдаланган. Банк ходими бинонинг нархини 12 млрд сўмга тушириб, банк ташкилоти ҳисобига олиб, маҳаллий тадбиркорга аукцион савдоларисиз 7 йил муддатга фоизсиз кредит ҳисобидан олиб бериш эвазига 90 минг АҚШ доллари талаб қилган.
Давлат хавфсизлик хизмати ходимлари томонидан ўтказилган тезкор тадбирда ушбу мансабдор шахс 40 минг АҚШ доллари олган вақтида ашёвий далиллар билан ушланди.
Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.
