Сурхондарёда ички аъзосига гиёҳванд модда яширган хорижлик ушланди
У тўғри ичагига 3 та полиэтилен ўрамида опий жойлаган.
Термиз халқаро савдо марказида 27 ёшли қўшни давлат фуқароси ички аъзоларига шубҳали предметларни яширгани аниқланди. Бу ҳақда Божхона қўмитаси хабар берди.
Маълум қилинишича, ушбу шахс ўзининг тўғри ичак қисмига 3 дона полиэтилен ўрамларни жойлаган. У 36 ёшли бошқа бир фуқарога ўрамларни топшираётган вақтида қўлга олинди.
Ўрамлар белгиланган тартибда ва холислар иштирокида очиб кўрилганида эса унинг ичидаги модда 203 гр. оғирликдаги “опий” гиёҳвандлик моддаси эканлиги аниқланди.
Шу куннинг ўзида тезкор тадбир Термиз шаҳрида давом эттирилиб, мазкур гиёҳвандлик воситаларини қабул қилиб олиши керак бўлган охирги шахс 40 ёшли фуқаро ҳам қўлга олинди.
Ҳозирда мазкур ҳолат юзасидан божхона органлари томонидан терговга қадар текширув ҳаракатлари олиб борилмоқда.
