Тошкент аэропортида одам савдоси билан шуғулланувчи гуруҳ аъзоси ушланди
У 4 нафар қизни алдаб, улардан бирини Дубайга олиб кетаётган бўлган.
Тошкентда 4 нафар қизни алдаб, улардан бирини Дубайга олиб кетаётган аёл аэропортда қўлга олинди. Бу ҳақда ДХХ хабар берди.
Маълум қилинишича, қизларни хорижий давлатларга жинсий эксплуатация учун юбориш билан шуғулланувчи жиноий гуруҳ вакили бўлган, 2002 йилда Тошкент вилоятининг Бўстонлиқ туманида туғилган аёл 4 нафар қизни алдаб, улардан бирини ўзи билан бирга Дубай шаҳрига олиб кетаётган вақтида Тошкент халқаро аэропортида тўхтатиб қолинди.
Ҳолат юзасидан унга нисбатан Жиноят Кодексининг 135-моддаси (одам савдоси) 2-қисми “з” банди билан жиноят иши қўзғатилиб, “қамоқ” эҳтиёт чораси қўлланилди. Ҳозирда тергов ҳаракатлари олиб борилмоқда.
Амалдаги қонунчиликка мувофиқ, бу турдаги жиноятлар учун 5 йилдан 10 йил муддатгача озодликдан маҳрум қилиш жазоси белгиланган.
