Тошкент вилоятида қиймати 3 млрд сўмдан ортиқ сув қувурлари талон-торож қилинди
Ҳолат юзасидан Пискент тумани сув таъминоти филиали раҳбари ва бошқа шахсларга нисбатан жиноят иши қўзғатилди.
Тошкент вилоятининг Пискент туманида сув таъминоти объектида йирик миқдордаги талон-торожлик ҳолати фош этилди. Бу ҳақда Коррупцияга қарши курашиш агентлиги маълум қилди.
Қайд этилишича, ҳолат Иқтисодий жиноятларга қарши курашиш департаментининг Тошкент вилоят бошқармаси ҳамда Ўзсувтаъминот АЖ комплаенс хизмати билан ҳамкорликда ўтказилган назорат ўлчовлари давомида аниқланган.
Текширувлар Пискент тумани “Гулистон” МФЙ ҳудудида жойлашган “Сағанак” сув иншоотини туман сув таъминоти филиали балансига ўтказиш жараёнида бажарилган қурилиш-монтаж ишлари доирасида олиб борилган.
Ўрганишлар натижасида “Тошкент вилояти сув таъминоти” АЖ Пискент тумани филиали раҳбари Б.К. ҳамда “А.” АЖ мансабдор шахслари олдиндан тил бириктириб, умумий қиймати 3 млрд 931,2 млн сўмлик сув қувурларининг 3 млрд 78,4 млн сўмлик қисмини, яъни 14 800 метрини қазиб олиб, ўзлаштириш йўли билан талон-торож қилгани аниқланган.
Мазкур ҳолат юзасидан масъул шахсларга нисбатан Жиноят кодексининг 167-моддаси 3-қисми “а” банди билан жиноят иши қўзғатилган.
