Тошкент вилоятида нарколаборатория фош этилди
Бир нечта шахслар қўлга олиниб, 10 килограммга яқин кучли таъсир қилувчи дори воситалари мусодара қилинди.
Тошкент шаҳри ва вилоятида кучли таъсир қилувчи дори воситалари савдоси билан шуғулланган жиноий гуруҳ фаолиятига чек қўйилди. Бу ҳақда ДХХ хабар берди.
Маълум қилинишича, Тошкент шаҳрининг Янгиҳаёт туманида ўтказилган тезкор тадбир давомида икки нафар шахс ушланиб, уларнинг ёнидан 500 дона кучли таъсир қилувчи дори воситалари ашёвий далил сифатида олинган. Уларнинг мазкур дориларни тарқатиш билан шуғуллангани аниқланган.
Кейинчалик ушбу шахсларга алоқадор бўлган яна бир тарқатувчи ҳам қўлга олиниб, унинг ёнидан ҳам 500 дона кучли таъсир қилувчи дори воситалари топилган.
Тезкор тадбирлар давом эттирилиб, мазкур дориларнинг манбасини аниқлаш ишлари олиб борилган. Натижада Тошкент вилоятининг Оҳангарон шаҳрида яна уч нафар шахс қўлга олинган. Уларнинг яшаш манзили кўздан кечирилганда нарколаборатория ташкил этилгани маълум бўлган.
Уйда ўтказилган кўрик давомида 9 килограмм “Прегабалин”, 500 грамм “Тропикамид”, 600 дона “Прегабалин” дори воситалари ҳамда қадоқлаш учун мўлжалланган анжомлар ашёвий далил сифатида мусодара қилинган.
Ҳозирда мазкур ҳолат юзасидан Жиноят кодексининг 251¹-моддаси 5-қисми билан жиноят иши қўзғатилиб, тергов ҳаракатлари олиб борилмоқда.
