Тошкентда 40 та сохта ЙТҲ орқали суғурта пулларини ўзлаштирган гуруҳ ушланди
Қалбаки ҳужжатларда зарар миқдори 13–14 миллион сўм атрофида кўрсатилган ва айнан шу суммалар суғурта товонлари сифатида ундирилган.
Тошкент шаҳрида саҳналаштирилган йўл-транспорт ҳодисалари орқали суғурта товонларини ноқонуний қўлга киритиб келган уюшган гуруҳ фаолияти фош этилди. Бу ҳақда Rost24 хабар берди.
Маълум қилинишича, “BLACK BULL RENT” МЧЖ раҳбари А.А. бошчилигидаги гуруҳ 2024 йил давомида амалда содир бўлмаган ЙТҲларни тизимли равишда уюштириб келган. Гуруҳ аъзолари ўзаро вазифаларни тақсимлаб, айримлари автомобиль топиш, бошқалари ҳайдовчи ёки жабрланувчи ролини бажариш, яна бир қисми эса ҳужжатларни қалбакилаштириш билан шуғулланган.
Тергов жараёнида улар жами 40 та сохта ЙТҲ ҳолатини расмийлаштиргани аниқланган. Ҳар бир эпизодда деярли бир хил схема қўлланган, бир хил автомобиллар бир неча бор турли ролларда ишлатилган. Айрим ҳолатларда битта транспорт воситаси бир сафар айбдор, кейинги сафар эса жабрланувчи сифатида кўрсатилган.
Фирибгарлик схемасида асосан Malibu-2, Tracker, Nexia ва ВАЗ русумидаги автомобиллардан фойдаланилган. Қалбакилаштирилган ҳужжатларда зарар миқдори деярли бир хил — 13–14 миллион сўм атрофида кўрсатилган ва айнан шу суммалар суғурта товонлари сифатида ундирилган.
Аниқланишича, мазкур схема орқали олтита суғурта компаниясига зарар етказилган. Умумий моддий зарар 811,8 миллион сўмни ташкил этган.
Мазкур ҳолат юзасидан жиноят ишлари бўйича суд ҳукми чиқарилиб, А. Абдусатторов, С. Абдусатторов ва З. Йўлдошев Жиноят кодексининг 168-моддаси (фирибгарлик) ҳамда 228-моддаси (ҳужжатларни қалбакилаштириш) билан айбдор деб топилди.
Айбланувчилар билан тузилган иқрорлик келишуви инобатга олиниб, уларнинг ҳар бирига 103 миллион 700 минг сўм миқдорида жарима жазоси тайинланди.
