Ўзбекистонда иш жойидаги бахтсиз ҳодисаларда 62 киши ҳалок бўлди
Энг кўп бахтсиз ҳодисалар саноат ва қурилиш соҳаларида кузатилган.
2026 йилнинг биринчи чорагида Ўзбекистонда ишлаб чиқариш билан боғлиқ 198 та бахтсиз ҳодиса қайд этилди. Бу ҳақда Камбағалликни қисқартириш ва бандлик вазирлиги маълум қилди.
Маълум қилинишича, қайд этилган ҳодисаларнинг 9 таси гуруҳли, 139 таси оғир оқибатли бўлган. 49 та ҳолат эса ўлим билан якунланган.
Мазкур бахтсиз ҳодисалар оқибатида жами 223 киши жабрланган. Шундан 146 нафари оғир, 15 нафари енгил тан жароҳати олган, 62 нафари эса вафот этган.
Таҳлилларга кўра, энг кўп бахтсиз ҳодисалар саноат ҳамда қурилиш соҳаларида содир бўлган. Хусусан, саноатда 71 та, қурилиш тармоғида эса 54 та ҳолат қайд этилган.
Ҳудудлар кесимида энг кўп ҳодисалар Тошкент шаҳрида 44 та, Сурхондарё вилоятида 36 та ҳамда Тошкент вилоятида 29 та қайд этилган.
