Оҳангаронда ППХ ходими вояга етмаган қизларга тегажоғлик қилишда гумонланмоқда
Мазкур ҳолат юзасидан ИИВ Жамоат хавфсизлиги департаменти текширув бошлади.
Ижтимоий тармоқларда Оҳангаронда ППХ ходими вояга етмаган қизларни тоғли ҳудудга олиб бориб, уларга шилқимлик қилгани ҳақида хабарлар тарқалди. Мазкур ҳолат юзасидан ИИВ Жамоат хавфсизлиги департаменти текширув бошланганини маълум қилди.
Маълумотларга кўра, патруль-пост хизмати ходими 14 ёшли қиз ва унинг дугонасини мажбурлаб автомобилга ўтқазиб, олис ҳудудга олиб борган ва ноқонуний ҳаракатлар содир этган. Қизлардан бирининг акаси телефондаги жойлашув орқали уларни топиб борган.
ИИВ Жамоат хавфсизлиги департаменти билдиришича, ҳолат юзасидан Ички ишлар вазирлигининг Ўз хавфсизлиги бўлинмаси томонидан прокуратура органлари билан ҳамкорликда билан текширув бошланган. Ҳодисанинг барча иштирокчилари ва юзага келган ҳолатлар аниқланган.Ходим ишдан бўшатилган.
“Келтирилган ҳолатлар тасдиқланган тақдирда, унинг ҳаракатларига қатъий ҳуқуқий баҳо берилади, жумладан, жиноий жавобгарликка тортилишгача бўлган чоралар қўлланади”, дейилади хабарда.
