Радар қўйишдан мақсад фақат пул қилиш бўлиб қоляпти — депутат
Депутат радарлардаги хатоликлар сабаб нотўғри қўлланилган жарималар ҳайдовчиларга қайтарилиши кераклигини айтди.
Олий Мажлис Қонунчилик палатаси депутати Даврон Арипов йўл ҳаракати қоидабузарликларини қайд этувчи радарларнинг хусусий сектор қўлига ўтганини, улар ҳозирда даромад манбаига айланиб қолганини айтди.
Шунингдек, бу хусусида халқдан норозилик хатлари келиб тушаётгани қайд этилди.
Депутатнинг билдиришича, айрим ҳайдовчилар радарлар орқали тезлик нотўғри ўлчанганини исботлаб берган. Бу ҳолатлар эса нотўғри қўлланган жарималар билан боғлиқ муаммоларни келтириб чиқармоқда.
Шу муносабат билан у хусусий тадбиркорлар зиммасидаги масъулиятни кучайтириш зарурлигини билдирди.
Арипов фикрича, агар техник хатолик ёки қасддан нотўғри ҳисоблаш натижасида ҳайдовчиларга асоссиз жарима қўлланган бўлса, тадбиркорлар зарар кўрган фуқароларга маблағларни тўлиқ қайтариши керак.
У бундай механизм жорий этилса, тадбиркорларнинг масъулият билан ишлаши ошишини таъкидлади.
Аввалроқ Ички ишлар вазирига камера ва радарлар фаолияти бўйича парламент сўрови юборилиб, депутатлар асоссиз жарималар, йўл белгилари ва радарлар жойлашуви бўйича ИИВдан изоҳ талаб қилгани ҳақида хабaр берилганди.
