Telegram'да “APK” дастурларни сотиб юрган йигит ушланди
Ушбу дастурлар орқали ўзгаларнинг хабарларини ўқиш, тўлов тизимларидаги маблағларни ўзлаштириш имконияти мавжуд бўлган.
Тошкент вилоятида Telegram орқали зарарли дастурлар сотиб келган шахс фаолиятига чек қўйилди. Бу ҳақда Zamon.uz'га ДХХ хабар қилди.
Маълум қилинишича, Чирчиқ шаҳрида яшовчи, 2005 йилда туғилган фуқаро ўзи яратган зарарли "APK" дастурларини 100–300 минг сўм оралиғидаги нархларда Telegram орқали камида 10 нафар фойдаланувчига сотган.
Тергов маълумотларига кўра, у харидорларга техник кўмак ҳам кўрсатиб, дастурлардан фойдаланиш жараёнида юзага келган муаммолар бўйича маслаҳатлар бериб келган.
Қайд этилишича, ушбу зарарли дастурлар орқали бошқаларнинг Telegram аккаунтларига рухсатсиз кириш, телефонлардаги SMS хабарларни ўқиш ва тўлов тизимларидаги маблағларни ўзлаштириш имконияти мавжуд бўлган.
Шунингдек, гумонланувчи Telegram'даги 5 дан ортиқ гуруҳ ва каналларга администраторлик қилиб, уларда мунтазам равишда мазкур дастурларнинг имкониятлари ҳақида пост жойлаб борган.
Тезкор тадбир давомида ундан Asus ExpertBook русумли ноутбук, Redmi Note 10 Pro телефони, қаттиқ диск ҳамда банк пластик карталари ашёвий далил сифатида олиб қўйилди.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
