Зеленский Россиянинг сулҳ таклифига муносабат билдирди
9 май арафасидаги сулҳ таклифи Трамп ва Путин ўртасидаги телефон суҳбатида илгари сурилган.
Володимир Зеленский Украина қисқа муддатли эмас, балки узоқ муддатли ўт очишни тўхтатиш тарафдори эканини маълум қилди. У Москвадаги Ғалаба куни паради учун “бир неча соатлик хавфсизлик” билан чекланиб қолмаслик зарурлигини таъкидлади.
Зеленский ўз баёнотида вакилларига АҚШ Президенти жамоаси билан боғланиб, Россия томонидан илгари сурилган сулҳ таклифининг аниқ тафсилотларини ўрганиш топширилганини билдирди.
Унинг сўзларига кўра, гап қисқа муддатли хавфсизлик чоралари ҳақида кетяптими ёки кенгроқ келишув назарда тутилганми — бу аниқлаштирилади.
“Бизнинг таклифимиз — ўт очишни узоқ муддатга тўхтатиш, аҳолининг хавфсизлигини ишончли таъминлаш ва барқарор тинчликка эришишдир. Украина бу йўлда ҳар қандай мақбул ва самарали форматда ишлашга тайёр”, — деди у.
Аввалроқ, Владимир Путин Доналд Трамп билан телефон мулоқоти чоғида 9 май арафасида вақтинчалик сулҳ эълон қилишни таклиф қилгани хабар қилинган эди.
Россия Президенти ёрдамчиси Юри Ушаковнинг билдиришича, суҳбат Россия ташаббуси билан ўтказилган. Трамп эса кейинчалик ушбу “кичик сулҳ” ғоясини айнан ўзи илгари сурганини айтган.
Маълумот учун, охирги марта фронтда сулҳ 2026 йил апрель ойида Пасха байрами муносабати билан эълон қилинган эди.
