Андижонда маҳалла раиси ва ҳоким ёрдамчиси 31 минг доллар пора билан ушланди
Улар фуқарога чорвачилик учун ажратилган ерни бошқа шахсга расмийлаштириб бериш учун жами 60 минг доллар талаб қилган.
Андижон туманидаги маҳаллалардан бирида маҳалла раиси ва ҳоким ёрдамчиси иштирокида ер ажратиш билан боғлиқ қонунбузарлик ҳолати аниқланди. Бу ҳақда Zamon.uz'га ДХХ хабар қилди.
Маълум қилинишича, улар ўзаро тил бириктириб, 1967 йилда туғилган фуқарога чорвачилик мақсадида ажратилган 2 сотих ер ҳамда давлат захирасидаги 28 сотих ер майдонини Андижон шаҳрида яшовчи 1989 йилда туғилган шахс номига расмийлаштириб беришни режалаштирган.
Ушбу ер майдонининг бир қисмини нотурар, қолган қисмини эса турар жой тоифасига ўзгартириб бериш эвазига улар 57 минг АҚШ доллари, шунингдек, кадастр ҳужжатларини расмийлаштириш учун яна 3 минг АҚШ доллари талаб қилган.
Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбир давомида мазкур шахслар олдиндан 28 минг АҚШ доллари ва кадастр ҳужжатлари учун 3 минг АҚШ долларини олган вақтда ашёвий далиллар билан ушланган.
Ҳозирда мазкур ҳолат юзасидан жиноят иши қўзғатилган бўлиб, тергов ҳаракатлари олиб борилмоқда.
