АҚШ шармандали мағлубиятга учради — Хоманаий
Олий раҳнамо АҚШнинг ҳарбий режалари муваффақиятсизликка учраганини таъкидламоқда.
Мужтабо Хоманаий АҚШнинг Эрон билан қарама-қаршиликда шармандали мағлубиятга учраганини билдирди. Бу ҳақда Ал Арабийa хабар берди.
Мурожаат Эрон телевидениеси диктори томонидан ўқиб эшиттирилди ва Хоминаийнинг расмий сайтида эълон қилинди.
Баёнотда Хоманаий сўнгги икки ой ичида минтақада кузатилган кескинликларни тилга олиб, АҚШнинг ҳарбий режалари муваффақиятсизликка учраганини таъкидлади. Унга кўра, эндиликда Форс кўрфази ва Ҳормуз бўғози атрофида “янги босқич” бошланмоқда.
Хоманаий март ойида олий раҳбар лавозимини эгаллаганидан бери жамоатчиликка чиқмаган. Унинг ушбу мурожаати Эронда нишонланадиган Форс кўрфази кунига тўғри келди.
Хоманаий мурожаатида: “Минтақадаги АҚШ ҳарбий базалари “ҳатто ўз хавфсизлигини таъминлаш салоҳиятига ҳам эга эмас, иттифоқчиларини ҳимоя қилиш у ёқда турсин,” — деди.
Шунингдек, у Эроннинг Ҳормуз бўғози устидан жорий этган янги бошқарув тизимини минтақа учун “фаровонлик ва тараққиёт” омили сифатида баҳолади.
Хоманаий АҚШсиз Форс кўрфазида “ёрқин келажак”ни башорат қилар экан, минтақага ташқи аралашувларни кескин танқид қилди.
Аввалроқ Эрон президенти Масъуд Пезешкиён ҳам АҚШнинг эҳтимолий денгиз блокадасини “муваффақиятсизликка маҳкум” деб атаган эди.
Унинг фикрича, бундай чоралар минтақавий хавфсизликни мустаҳкамлаш ўрнига, аксинча кескинликни кучайтиради.
Шу билан бирга, Эрон ҳарбий-денгиз кучлари қўмондони Шаҳрам Ирани яқин вақт ичида янги ишлаб чиқилган денгиз қуроллари жойлаштирилишини билдирган.
