Сирдарёда норасмий никоҳдаги аёл эрининг қонуний хотини ва қизини пичоқлаб ўлдирди
Ҳалок бўлган аёлнинг 4 нафар фарзанди бўлган. 3 ёшли қизи ҳам пичоқланиб, оғир аҳволда шифохонага ётқизилган.
Сирдарё вилоятининг Ширин шаҳрида содир бўлган оғир жиноят оқибатида аёл ва унинг 5 ёшли қизи ҳалок бўлди, яна бир 3 ёшли қизалоқ эса оғир аҳволда шифохонага ётқизилди. Бу ҳақда Kun.uz хабар берди.
Маълумотларга кўра, воқеа 29 апрель куни кечга яқин юз берган. 1997 йилда туғилган аёл ўз уйида уй юмушлари билан банд бўлган вақтида турмуш ўртоғининг шаръий никоҳдаги аёли — 29 ёшли Н.Х. хонадонга кириб келиб, унга ва икки нафар фарзандига пичоқ билан ҳужум қилган. Шундан сўнг гумонланувчи воқеа жойидан яширинган.
Ҳужум оқибатида аёл ва унинг 5 ёшли қизи воқеа жойида вафот этган. 3 ёшли қизалоқ эса оғир аҳволда шифохонага олиб кетилган бўлиб, ҳозирда жонлантириш бўлимида қолмоқда.
Mарҳуманинг яқинлари билдиришича, аёл Тошкент вилоятининг Бекобод шаҳридан Сирдарёга келин бўлган.
“У аёл бир неча бор куёвимга бориб хотинингни ўлдираман деб айтган экан. Куёвим қўлингдан келмайди, деган. Мана, нима бўлди, қизим ва неварамдан айрилдим. Қизимнинг 4 фарзанди бор эди. 8 ёшли ўғли ва 20 кунлик чақалоғи қолди.
Шифохонадаги неварам ҳам оғир аҳволда. Тегишли ташкилотлардан илтимос қиламан, уларни бизнинг қарамоғимизга олиб беришсин”, деган аёлнинг отаси.
“Ўша куни опам уйида кир ювиб ўтирган бўлган. У аёл бориб, пичоқ билан ташланган. Бақир-чақирни эшитиб, уйдан икки қизи югуриб чиққан. Уларга ҳам пичоқ урган”, деган марҳуманинг жияни.
Бош прокурор матбуот котиби Ҳаёт Шамсутдиновнинг нашрга билдришича, ҳолат юзасидан Сирдарё вилояти ўта оғир жиноятларни тергов қилиш бўлими томонидан Жиноят кодексининг 97-моддаси (қасддан оам ўлдириш) 2-қисми “а,в,ж” бандлари билан жиноят иши қўзғатилган.
Гумонланувчи Н.Х. процессуал тартибда ушланган.
