Сирдарёда шаръий эрининг хотини ва боласини ўлдирган аёл қамоққа олинди
Аёл қасддан одам ўлдиришда айбланиб, тергов ҳибсхонасига жойлаштирилди.
Сирдарё вилоятининг Ширин шаҳрида аёл норасмий никоҳдаги эрининг хотинини ва 2 нафар қизини пичоқлагани, оқибатда аёл ва 5 ёшли қизи вафот этгани хабар қилинганди.
Мазкур вазият юзасидан Олий суд ахборот хизмати расмий ахборот берди.
Маълум қилинишича, жиноят ишлари бўйича Ширин туман судида Ширин шаҳар прокурорининг Жиноят кодексининг 97-моддаси (қасддан одам ўлдириш) 2-қисми “а”, “в”, “ж” бандларида назарда тутилган жиноятни содир этганликда айбланувчи Н. Х. (аёл, 1997 йилда Сирдарё вилоятида туғилган) га нисбатан “қамоққа олиш” тарзидаги эҳтиёт чорасини қўллаш тўғрисидаги илтимосномаси тақдим этилган ҳужжатлар билан кўриб чиқилди.
Суднинг 2026 йил 30 апрелдаги ажрими билан илтимоснома қаноатлантирилиб, айбланувчи Н. Х. қамоққа олиниши ва тергов ҳибсхонасига жойлаштирилиши белгиланди.
