Тошкентда автомобиль устида рақсга тушган ўсмирларга чора кўрилди
Вояга етмаганларнинг ота-оналарига нисбатан маъмурий баённома расмийлаштирилди.
Ижтимоий тармоқларда йўлнинг қатнов қисмида автомобиль томига чиқиб рақсга тушган вояга етмаганлар акс этган видео тарқалди. Мазкур ҳолат юзасидан Тошкент шаҳар ИИББ расмий муносабат билдирди.
Маълум қилинишича, ҳодиса жорий йилнинг 26 апрель куни тунги соат 02:00 атрофида Юнусобод туманидаги Амир Темур – Алишер Навоий ҳамда Алишер Навоий – Шаҳрисабз кўчалари кесишмасида содир бўлган. Унда Nexia-2 русумли автомобиль томига бир нечта вояга етмаган шахслар чиқиб, йўл ўртасида рақсга тушган.
Аниқланишича, ҳайдовчи вояга етмаганлар билан мулоқотга киришиб, автомобилдаги мусиқа овозини баландлатган ҳамда уларнинг ушбу ҳаракатига шароит яратган. Натижада йўл безорилиги содир этилган.
Ҳолат юзасидан ҳайдовчига нисбатан Маъмурий жавобгарлик тўғрисидаги кодекснинг 128-прим 10-моддаси 1-қисми асосида маъмурий баённома расмийлаштирилди, автомобиль эса жарима майдонига жойлаштирилди.
Маълумотларга кўра, вояга етмаганлар Сурхондарё вилоятида истиқомат қилади ва ота-онасининг қаровисиз Тошкент шаҳрида бўлган. Улар Сурхондарё вилояти ИИБ ҳузуридаги вояга етмаганларга ижтимоий-ҳуқуқий ёрдам кўрсатиш марказига юборилган.
Шунингдек, вояга етмаганларнинг ота-оналарига нисбатан МЖтКнинг 47-моддаси асосида маъмурий баённома расмийлаштирилган.
