Эрон яҳудийлари вакили Мужтабо Хоманаий раҳбариятини қўллаб-қувватлади
Эрон яҳудийлари жамиятнинг ажралмас қисми экани таъкидланиб, мамлакат раҳбариятига нисбатан ижобий муносабат билдирилди.
Эрон яҳудийлар жамоаси вакили Ҳумоюн Самеҳ Нажафабадий мамлакат олий раҳбари Мужтаба Хоманаий бошчилигидаги раҳбариятни қўллаб-қувватлашини маълум қилди. Бу ҳақда Al Mayadeen ёзмоқда.
Унинг баёноти АҚШ ва Исроил сиёсатига қарши ўтказилган оммавий йиғилишда янграган. Нутқда Эрон яҳудийлари жамиятнинг ажралмас қисми экани таъкидланиб, мамлакат раҳбариятига нисбатан ижобий муносабат билдирилди.
Шунингдек, у халқ ва қуролли кучлар ўртасидаги бирлик муҳимлигини таъкидлаб, босимларга қарши эронликлар намойиш этаётган “қатъий қаршилик”ни юқори баҳолади.
“Доимо севимли Эронимизнинг ғалабасига гувоҳ бўлайлик ва яқинлашиб келаётган зафарни биргаликда нишонлайлик — бу бизнинг собитлигимиз ва бирдамлигимиз самарасидир”, — дея сўзини якунлади у.
Маълумотларга кўра, сўнгги ҳафталарда Эронга қарши юз берган ҳарбий ҳаракатлар давомида Теҳрондаги яҳудий ибодат масканларидан бири — Рафи Ниа синагогаси зарарланган.
Мазкур ҳолат юзасидан Ҳумоюн Самеҳ Нажафабадий аввалроқ баёнот бериб, зарбаларни кескин қоралаган ва диний объектлар нишонга олинганини билдирган.
Унинг таъкидлашича, бу каби ҳодисалар нафақат мусулмонлар, балки бошқа диний жамоаларга ҳам таъсир кўрсатмоқда.
