Наманганда 2 киши қалбаки доллар сотаётганда ушланди
Улар қалбаки 10 минг долларни ҳақиқий 7,5 минг долларга сотмоқчи бўлган.
Наманган вилоятида қалбаки валюта савдоси билан боғлиқ жиноят фош этилди. Бу ҳақда Zamon.uz'га ДХХ хабар қилди.
Маълум қилинишича, Чуст туманида масъул ходимлар томонидан ўтказилган тезкор тадбирда икки нафар фуқаро — 1984 йилда туғилган ва Янги Наманган туманида яшовчи шахс ҳамда 1980 йилда туғилган, муқаддам судланган, Чуст туманида истиқомат қилувчи шахс ўзаро тил бириктириб жиноий фаолият олиб боргани аниқланган.
Улар хориждан олиб кирилган 10 минг АҚШ доллари миқдоридаги қалбаки пулни шартли харидорга ҳақиқий 7,5 минг АҚШ долларига сотишга уринган вақтда қўлга олинган.
Ҳолат юзасидан жиноят иши қўзғатилган бўлиб, айни пайтда тергов ҳаракатлари олиб борилмоқда.
