Наманганда аёл укол олаётганда вафот этди
Ҳолат юзасидан ҳамширага нисбатан жиноят иши қўзғатилди.
Ижтимоий тармоқларда Наманганда аёл укол олаётганда вафот этгани ҳақида хабарлар тарқалди. Мазкур ҳолатга вилоят прокуратураси расмий муносабат билдирди.
Маълум қилинишича, Янгиқўрғон тумани, “Янги Боғистон” маҳалласида яшаган, 1987 йилда туғилган фуқаро Т. М. 2026 йилнинг 28 март куни “Ғовозон” ОШПда муолажа олаётган вақтида соғлиғи ёмонлашиб вафот этган.
Мазкур ҳолат юзасидан Янгиқўрғон туман прокуратураси томонидан Янгиқўрғон ТТБ.га қарашли “Ғовозон” ОШП ТБХ оила ҳамшираси Г.Э.га нисбатан ЖКнинг 116-моддаси 3-қисми билан жиноят иши қўзғатилган.
Ҳозирда Янгиқўрғон туман прокуратураси томонидан тергов ҳаракатлари олиб борилмоқда.
Жиноят иши тергови вилоят прокуратураси томонидан назоратга олинган.
