Навоий вилоятида олтинни ноқонуний қазиб олиш ва қайта ишлаш ҳолати аниқланди
Томди туманида умумий баҳоси 569,8 млн сўм бўлган маъданли тошлар ашёвий далил сифатида олинди.
2026 йил январь–март ойларида бир нечта ҳудудда олтинни ноқонуний қазиб олиш ва қайта ишлаш билан боғлиқ ҳолатлар аниқланиб, тўхтатилди. Бу ҳақда Бу ҳақда Иқтисодий жиноятларга қарши курашиш департаменти хабар берди.
Маълум қилинишича, Томди туманида ўтказилган тезкор тадбирда фуқаро О.И. ва бошқа шахслар “Бессопан” саноат майдонида умумий баҳоси 569,8 млн сўмлик, таркибида 315,1 грамм олтин моддаси мавжуд бўлган 5 200 кг маъданли тошларни ноқонуний қазиб олаётган вақтида ушланиб, ушбу маҳсулотлар ашёвий далил сифатида расмийлаштирилди.
Шунингдек, Конимех туманида ўтказилган тадбирда фуқаролар Т.Т. ва Т.Ғ. “Караката” ОФЙ ҳудудида ўзаро тил бириктириб, таркибида олтин мавжуд қум ва тошларни махсус ускуналар ёрдамида ноқонуний қазиб олиш билан шуғулланиб келаётгани аниқланган.
Хатирчи туманида эса фуқаро У.Р. “Зарафшон” МФЙдаги хонадонида қум ва тошдан олтин ажратиб олиш билан шуғулланиб келгани фош этилиб, ундан таркибида олтин зарралари бўлган 160 кг қум-тош ашёвий далил сифатида олинган. Шу ҳудудда яна бир фуқаро С.Х. ҳам худди шундай фаолият билан шуғуллангани аниқланиб, ундан 300 кг қум-тош шёвий далил сифатида олинган.
Мазкур ҳолатлар юзасидан Жиноят кодексининг 196-2-моддаси (фойдали қазилмаларни рухсатномасиз қазиб олиш) билан жиноят ишлари қўзғатилиб, тергов ҳаракатлари олиб борилмоқда.
