Тошкентда профилактика инспектори 10 минг доллар пора билан ушланди
У МЧЖ эгасидан бошқа бир шахсга қарши жиноят иши қўзғатиш ва уни жавобгарликка тортиш эвазига пул талаб қилган.
Тошкент шаҳрида профилактика инспектори иштирокидаги ноқонуний ҳолат фош этилди. Бу ҳақда Zamon.uz'гa ДХХ хабар берди.
Маълум қилинишича, Учтепа тумани ИИО ФМБ Ҳуқуқбузарликлар профилактикаси бўлими профилактика катта инспектори 1995 йилда туғилган фуқародан ноқонуний равишда 10 минг АҚШ доллари олган вақтида ашёвий далиллар билан ушланди.
Маълумотларга кўра, инспектор 2025 йилнинг декабрь ойида мазкур фуқарога тегишли МЧЖ ҳужжатларини сохталаштириш орқали ИТ-хизмати кўрсатиш эвазига фирибгарлик йўли билан чет эл фуқаросидан 450 минг АҚШ доллари олган 1990 йилда туғилган шахсга нисбатан жиноят иши қўзғатиш ва уни жавобгарликка тортишни ваъда бериб, ушбу пул маблағини талаб қилган.
Терговга қадар текширув давомида жорий йилнинг февраль ойида ички ишлар органлари томонидан МЧЖ билан боғлиқ фирибгарлик ҳолати бўйича жиноят иши қўзғатишни рад этиш тўғрисида қарор қабул қилингани аниқланган.
Ҳозирда катта инспекторга нисбатан жиноят иши қўзғатилиб, тергов ҳаракатлари олиб борилмоқда.
