Сурхондарёда сув ҳавзалари нефтдан тозаланмоқда
Нефть оқиши юзасидан Surxan Gas Chemical Operating Company фаолиятига ҳуқуқий баҳо бериш бўйича текширув ишлари олиб борилмоқда.
Сурхондарё вилоятида нефть билан ифлосланган сув ҳавзалари тозаланмоқда. Бу ҳақда вилоят Экология ва иқлим ўзгариши бош бошқармаси матбуот хизмати хабар берди.
Бойсун туманида 23 апрель куни дарёга нефть аралаш суюқлик оқиб кетгани ҳақида хабар берилганди. Ҳодиса Surxan Gas Chemical Operating Company МЧЖ қўшма корхонасига қарашли қудуқда юз бергани аниқланган. 2 май куни кучли сел сабаб хандақ бузилиши оқибатида яна нефть аралаш суюқлик сизиб чиқди.
Ўрганишларга кўра, таркибида нефть бўлган аралашма Бойсун туманидаги “Хонгаронсой” ҳудудидан оқим бўйлаб Бандихон ва Қумқўрғон туманларига, “Сурхон” дарёсига, шунингдек Жарқўрғон туманидаги “Занг” канали орқали Ангор туманигача етиб борган.
Расмийларга кўра, ҳолат вилоят Экология ва иқлим ўзгариши бошқармаси ҳамда бошқа тегишли ташкилотлар томонидан назоратга олинган. Жарқўрғон туманидаги “Занг” каналида ва унга туташ ҳудудларда нефть маҳсулотларини ушлаб қолиш учун махсус тўсиқлар ўрнатилиб, сув юзасидаги нефть қатламини механик усулда йиғиб олиш ишлари олиб борилмоқда. Ифлосланган сувни ажратиш ва зарарсизлантириш учун махсус техникалар жалб этилган.
Шунингдек, Бойсун туманида нефть аралашмаси сизиб чиқаётган ҳудуддаги сел йўллари ёпилиб, оқим локализация қилингани билдирилган.
Мазкур ҳолат юзасидан атроф-муҳитга етказилган зарар миқдорини аниқлаш, сабаб ва омилларни ўрганиш ҳамда масъул субъект, жумладан Surxan Gas Chemical Operating Company фаолиятига ҳуқуқий баҳо бериш бўйича текширув ишлари олиб борилмоқда.
