Оқ уй яқинида отишма содир бўлди, бир бола яраланди
Ҳужумнинг АҚШ президенти Доналд Трампга қаратилган бўлиши мумкинлиги ўрганилмоқда.
АҚШ пойтахти Вашингтонда Оқ уй яқинида қуролланган шахс билан отишма содир бўлди. Бу ҳақда Al Jazeera хабар берди.
АҚШ Махфий хизмати маълумотига кўра, гумонланувчи агентларга қарата ўқ узганидан сўнг жавоб ўқи билан яраланган.
Ҳодиса душанба куни юз берган. Фуқаролик кийимидаги агентлар қурол кўтариб юрган “шубҳали шахс”ни аниқлаб, уни кузата бошлаган. Кейинчалик воқеа жойига етиб келган форма кийган ходимлар гумонланувчини қўлга олишга уринган, бироқ у қочишга ҳаракат қилиб, ўқ узган. Шундан сўнг агентлар жавоб ўқи отган.
Яраланган шахс шифохонага олиб кетилган, ундан ўқотар қурол топилган. Ҳодиса юзасидан Колумбия Метрополитан полицияси томонидан тергов ҳаракатлари олиб борилмоқда.
Отишма вақтида бир нафар бола ҳам жароҳат олган, бироқ унинг ҳаётига хавф йўқлиги айтилмоқда. Терговчилар дастлабки маълумотларга кўра, бола гумонланувчи томонидан яраланган бўлиши мумкинлигини билдирмоқда.
Расмийларга кўра, ҳужумчи АҚШ президенти Доналд Трампни нишонга олган-олмагани аниқланмоқда. Шунингдек, ҳодисадан сал аввал ҳудуддан ўтган витсе-президент Жей Ди Вэнс кортежи билан боғлиқлик аниқланмаган.
Мазкур воқеа ўтган ой Оқ уй мухбирлари кечасида Трампга нисбатан содир этилган суиқасдга уринишдан сўнг юз берди. Ўшанда 31 ёшли Коул Томас Аллен президентни ўлдиришга уринишда айбланиб қўлга олинган.
