Словакия бош вазири Москвага боради, бироқ 9 май парадида қатнашмайди
Фицо Россия Президенти билан қисқа учрашув ўтказишини ва “Номаълум аскар” пойига гул қўйишини билдирди.
Словакия бош вазири Роберт Фицо 9 май куни Москвага ташриф буюриб, Россия президенти Владимир Путин билан учрашади, аммо “Ғалаба куни”га бағишланган ҳарбий парадда иштирок этмайди, дея хабар бермоқда eurointegration.com.
Бу ҳақда бош вазир Европа сиёсий ҳамжамияти саммити доирасида журналистларга берган изоҳида маълум қилган.
Аввалроқ Кремль Словакия бош вазири 9 май куни Москвадаги ҳарбий парад меҳмонлари орасида бўлишини билдирганди. Бироқ Фицо бу маълумотни рад этиб, ташриф доирасида фақат “Номаълум аскар” ёдгорлигига гул қўйишни режалаштираётганини таъкидлади.
“Мен Қизил Армия номаълум аскари қабри пойига гул қўяман, словак халқи номидан озодлик учун миннатдорлик билдираман ва президент Путин билан қисқа учрашув ўтказаман. Мен ҳеч қандай ҳарбий парадга бормайман”, — деди у.
Бош вазир, шунингдек, Еврокомиссия томонидан танқид қилинган Россияга сафар қарорини ҳимоя қилди. Шу билан бирга, Чехия Словакия ҳукумат самолётининг 9 май олдидан Москвага парвози учун ўз ҳаво ҳудудидан ўтишига рухсат бергани маълум бўлди. Аввалроқ эса Болтиқбўйи давлатлари Фицонинг Россиядаги парадда иштирок этишига норозилик билдириб, унга ҳаво ҳудудини ёпган эди.
Ўтган йили ҳам шунга ўхшаш вазият кузатилиб, Фицо Москвага айланма йўл орқали учиб борган. Ўша пайтда у ва Сербия президенти Александар Вючич 9 май тантаналарида Европадан давлат раҳбарлари даражасида қатнашган ягона меҳмонлар бўлган.
