Сурхондарёда 7,7 гектар ерни 800 млнга сотмоқчи бўлган фермер ушланди
Фермер қишлоқ хўжалигига мўлжалланган ер майдонини фуқаро номига расмийлаштириб бермоқчи бўлган.
Сурхондарёда фермер ер майдонини ноқонуний сотмоқчи бўлган вақтида ушланди. Бу ҳақда ДХХ хабар берди.
Маълум қилинишича, Ангор туманида фермер хўжалиги раҳбари қишлоқ хўжалигига мўлжалланган 7,7 гектар ер майдонини фуқаро номига расмийлаштириб бериш эвазига 800 миллион сўм талаб қилгани аниқланди.
Фермер ушбу маблағнинг 520 миллион сўмини олдиндан олган. Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбирда фермер қолган 280 миллион сўмни олаётган вақтида ашёвий далиллар билан қўлга олинди.
Ҳозирда мазкур ҳолат юзасидан жиноят иши қўзғатилган бўлиб, тергов ҳаракатлари олиб борилмоқда.
