“14 нафар бола жароҳатлар билан шифохонага ётқизилди”
Навоий вилоятида боғча болалари билан содир бўлган ЙТҲ юзасидан расмий маълумот берилди.
Навоий вилоятида боғча болалари билан ЙТҲ содир бўлгани ҳақида хабар берилганди. Ушбу ҳолат юзасидан вилоят ЙҲХБ расмий маълумот берди.
Маълум қилинишича, 2026 йил 5 май куни соат 09:05 атрофида Навоий вилояти Нурота тумани “Янги ҳаёт” МФЙ ҳудудидан ўтувчи маҳаллий аҳамиятдаги 85В-043 автомобиль йўлининг 8–9-километрлар оралиғида йўл-транспорт ҳодисаси содир бўлган.
Дастлабки маълумотларга кўра, 1992 йилда туғилган Г.Қ. тегишли ҳужжатларсиз Matiz русумли автомобилни бошқариб кетаётиб, тажрибасизлиги ва чалғиши оқибатида руль бошқарувини йўқотган. Натижада автомобиль йўлнинг чап томонига чиқиб кетиб, ағдарилган.
Ҳодиса оқибатида ҳайдовчи кўрсатилган тиббий муолажаларга қарамай шифохонада вафот этган. Автомобилда бўлган 14 нафар вояга етмаган йўловчи турли даражадаги тан жароҳатлари билан шифохонага ётқизилган.
Суриштирувлар давомида ҳайдовчи Г.Қ. оилавий нодавлат мактабгача таълим ташкилоти раҳбари сифатида фаолият юритгани аниқланган. Шунингдек, вояга етмаганларнинг енгил автомобилда белгиланган қоидаларга зид тарзда ташилгани қайд этилган.
Мазкур ҳолат юзасидан терговга қадар суриштирув ҳаракатлари олиб борилмоқда.
