Президент Шавкат Мирзиёев Си Цзиньпинга ҳамдардлик билдирди
Хунан провинциясидаги портлаш оқибатида 21 киши ҳалок бўлиб, 61 киши жароҳат олган эди.
Президент Шавкат Мирзиёев Хитой Халқ Республикаси Раиси Си Цзиньпинга Хунан провинциясидаги саноат корхонасида юз берган фожиа оқибатида кўплаб инсонлар ҳалок бўлгани ва жароҳат олгани муносабати билан чуқур ҳамдардлик билдирди.
Давлат раҳбари ҳалок бўлганларнинг оила аъзолари ва яқинларига сабр-тоқат тилаб, жабрланганларнинг тез фурсатда соғайиб кетишини тилади.
Аввал хабар қилинганидек, Лиуянг шаҳридаги пиротехника заводида содир бўлган кучли портлаш оқибатида камида 21 киши ҳалок бўлган, 61 киши турли даражада тан жароҳати олган.
Қидирув-қутқарув ишларига қарийб 500 нафар ходим жалб этилган бўлиб, ҳодиса жойида вайроналар остида қолганларни аниқлаш учун замонавий робот технологияларидан ҳам фойдаланилгани маълум қилинган эди.
