Сурияда ўзбекистонлик жангарилар қўлга олинди — Reuters

Сурия хавфсизлик кучлари мамлакат шимоли-ғарбида ўтказилган махсус операция давомида ўзбекистонлик жангариларни ҳибсга олди. Бу ҳақда икки нафар Сурия хавфсизлик ходими Reuters агентлигига маълум қилди.

 

Манбаларга кўра, воқеа Идлиб вилоятида юзага келган кескинлик ортидан содир бўлган. Аввалроқ ҳукумат кучлари Идлиб шаҳрида отишма содир этганликда гумон қилинган ўзбекистонлик жангарини қўлга олишга уринган. Ушбу уриниш қуролланган жангарилар томонидан норозилик намойишларига сабаб бўлиб, улар ҳибсга олинган шахсни озод қилишни талаб қилган.

 

Кейинчалик вазият кескинлашиб, Идлибнинг Кафрия ва ал-Фуа туманларида хавфсизлик рейдлари ўтказилган. Операция давомида намойишларда иштирок этган ва хавфсизлик кучлари томонидан “нишонга олинган” ўзбекистонлик жангарилар қўлга олинган. Ҳудудда ҳарбий кучлар ва техника жойлаштирилгани, айрим жойларда отишма овозлари эшитилгани қайд этилган. Сурия Ички ишлар вазирлиги Reuters сўровига дарҳол изоҳ бермаган.

 

Ҳозирча қанча ўзбекистонлик жангари ҳибсга олингани аниқ эмас.

 

Реутерсъга кўра, Сурия хавфсизлик манбаси ўтган йили мамлакатда тахминан 1500 нафар ўзбекистонлик жангари бўлгани, уларнинг айримлари оилалари билан бирга яшаётганини билдирган.

 

Мазкур ҳодиса Сурия ҳукумати ва хорижий жангарилар ўртасидаги сўнгги ойлардаги иккинчи йирик тўқнашув сифатида баҳоланмоқда. Аввалроқ Идлиб яқинида француз жиҳодчиси Омар Диаби (Омар Омсен) билан боғлиқ лагерь атрофида ҳам кескинлик юзага келган.

 

Сурия ҳукумати сўнгги йилларда хорижий жангарилар мақомини тартибга солиш ва уларнинг бир қисмини янги тузилаётган давлат армияси таркибига интеграция қилишга ҳаракат қилмоқда. Айрим хорижий жангарилар аллақачон хавфсизлик тузилмаларида юқори лавозимларга тайинланган.

 

Reuters маълумотига кўра, АҚШ ҳам илгари Сурия режаси доирасида минглаб хорижий жангариларни расмий ҳарбий тузилмаларга қўшиш ташаббусини маъқуллаган, бу эса уларни давлат назоратига олиш стратегияси сифатида баҳоланган.