Андижонда Давлат активлари бошқармаси бош мутахассиси 15 минг доллар пора билан ушланди

Андижонда давлат мулки, электр ва ер участкаси билан боғлиқ коррупсион ҳолатлар фош этилди. Бу ҳақда ДХХ хабар берди.

 

Маълум қилинишича, Давлат активларини бошқариш агентлиги ва Давлат мулки объектларидан самарали фойдаланиш марказининг Андижон вилояти ҳудудий бошқармалари томонидан маҳаллий тадбиркор билан Избоскан туманидаги кўчмас мулк объектини асосий тўловларини тўлаш шарти билан сотиб олиш ҳақида тузилган уч томонлама шартнома шартларига тадбиркор риоя қилмагани рўкач қилиниб, шартномани бекор қилиш, устама ва жарима ундириш юзасидан фуқаролик ишлари бўйича судга апелляция шикояти киритилган.

 

 

Бундан хабардор бўлган Давлат активларини бошқариш агентлигининг ҳудудий бошқармаси бош мутахассиси юқори лавозимда ишловчи танишлари орқали суд ажримини тадбиркор фойдасига ҳал этиш ва тузилган шартномани бекор қилмаслик эвазига 15 минг АҚШ доллари талаб қилган.

 

Бош мутахассис сўралган пул маблағини учинчи шахс орқали олган вақтида қўлга олинган.

 

 

Иккинчи ҳолатда “Ҳудудий электр тармоқлари” АЖ Андижон ҳудудий филиали муҳандиси томонидан якка тартибдаги тадбиркор фаолиятида электр энергиясидан ноқонуний фойдаланиш ҳолати юзасидан тузилган 650 млн сўмлик зарар ҳисобини 40 млн сўмга камайтириш эвазига 15 минг АҚШ доллари талаб қилинган. У шундан 10 минг АҚШ долларини олаётган пайтда қўлга олинган.

 

Учинчи ҳолатда эса туманлардан бирининг Кадастр бўлими бошлиғи фуқаро учун ер майдони ажратиб бериш эвазига 3 минг АҚШ доллари олгани аниқланган. Шунингдек, у 8 сотих ер ажратилгани ҳақида сохта ҳужжат расмийлаштиргани маълум бўлган.

 

 

Кейинчалик ўтказилган текширувларда мазкур ер майдони ноқонуний ажратилгани аниқланиб, фуқарога нисбатан 82 млн сўм жарима қўлланилган. Мазкур мансабдор шахс ҳам 3 минг АҚШ долларини қайтариш жараёнида фош этилган.

 

Ҳозирда барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.