Арманистон бош вазири Москвадаги 9 май тадбирларида қатнашмайди
Россия ТИВ Никол Пашиняннинг мазкур қарорига эътироз билдирди.
Арманистон бош вазири Никол Пашинян 9 май куни Москвада ўтказиладиган тантаналарда иштирок этмаслигини маълум қилди. У бу қарорини 1 апрель куни Россияга ташрифи давомида Владимир Путинга билдирган. Бу ҳақда DW хабар берди.
Расмий изоҳга кўра, сафарнинг бекор қилинишига мамлакатда бошланаётган сайловолди кампанияси сабаб бўлган. Арманистонда парламент сайловлари 7 июнга белгиланган бўлиб, унинг якунларига кўра янги ҳукумат раҳбари аниқланади.
Шу фонда Россия Ташқи ишлар вазирлиги расмий вакили Мария Захарова Ереванни илгари берилган “Россияга қарши ҳаракат қилмаслик” мажбуриятига амал қилмасликда айблади. У, шунингдек, Арманистоннинг Украина президенти Володимир Зеленскийни қабул қилганини танқид қилиб, бу ҳолат Россия жамоатчилигида норозилик уйғотганини таъкидлади.
Аввалроқ Словакия бош вазири Роберт Фицо ҳам Қизил майдондаги парадда қатнашмаслигини, Москвага бориб Путин билан учрашиб, “Номаълум аскар” пойига гул қўйишини маълум қилганди.
Эслатиб ўтамиз, жорий ҳафта бошида Европа Иттифоқи ва Арманистон ўртасида тарихда илк бор икки томонлама саммит бўлиб ўтди. Унда Зеленский ҳам иштирок этди.
Ереванда ўтган учрашувда хавфсизлик ва мудофаа, энергетика, транспорт ҳамда рақамлаштириш йўналишларида ҳамкорликни кенгайтириш масалалари, шунингдек Украинадаги вазият ва Эрондаги уруш оқибатлари муҳокама қилинди.
