Slovakiya bosh vaziri Moskvaga boradi, biroq 9-may paradida qatnashmaydi
Fitso Rossiya Prezidenti bilan qisqa uchrashuv o‘tkazishini va “Noma’lum askar” poyiga gul qo‘yishini bildirdi.
Slovakiya bosh vaziri Robert Fitso 9-may kuni Moskvaga tashrif buyurib, Rossiya prezidenti Vladimir Putin bilan uchrashadi, ammo “G‘alaba kuni”ga bag‘ishlangan harbiy paradda ishtirok etmaydi, deya xabar bermoqda eurointegration.com.
Bu haqda bosh vazir Yevropa siyosiy hamjamiyati sammiti doirasida jurnalistlarga bergan izohida ma’lum qilgan.
Avvalroq Kreml Slovakiya bosh vaziri 9-may kuni Moskvadagi harbiy parad mehmonlari orasida bo‘lishini bildirgandi. Biroq Fitso bu ma’lumotni rad etib, tashrif doirasida faqat “Noma’lum askar” yodgorligiga gul qo‘yishni rejalashtirayotganini ta’kidladi.
“Men Qizil Armiya noma’lum askari qabri poyiga gul qo‘yaman, slovak xalqi nomidan ozodlik uchun minnatdorlik bildiraman va prezident Putin bilan qisqa uchrashuv o‘tkazaman. Men hech qanday harbiy paradga bormayman”, — dedi u.
Bosh vazir, shuningdek, Yevrokomissiya tomonidan tanqid qilingan Rossiyaga safar qarorini himoya qildi. Shu bilan birga, Chexiya Slovakiya hukumat samolyotining 9-may oldidan Moskvaga parvozi uchun o‘z havo hududidan o‘tishiga ruxsat bergani ma’lum bo‘ldi. Avvalroq esa Boltiqbo‘yi davlatlari Fitsoning Rossiyadagi paradda ishtirok etishiga norozilik bildirib, unga havo hududini yopgan edi.
O‘tgan yili ham shunga o‘xshash vaziyat kuzatilib, Fitso Moskvaga aylanma yo‘l orqali uchib borgan. O‘sha paytda u va Serbiya prezidenti Aleksandr Vyuchich 9-may tantanalarida Yevropadan davlat rahbarlari darajasida qatnashgan yagona mehmonlar bo‘lgan.
