Бухорода ЙПХ ходими пиёдани уриб кетди
Ижтимоий тармоқларда тарқалган хабарларга ойдинлик киритилди.
Ижтимоий тармоқларда Бухоро вилояти Вобкент туманида ЙПХ ходими автомобилда пиёдани уриб юборгани ҳақида хабарлар тарқалди. Ҳолат юзасидан Бухоро ЙҲХБ расмий маълумот берди.
Маълум қилинишича, ҳодиса 2026 йил 27 апрель куни соат 09:05 атрофида Вобкент тумани, Имом Бухорий кўчасида содир бўлган. Вилоят Йўл ҳаракати хавфсизлиги бошқармаси ходими, 1987 йилда туғилган Ё. Мавлонов ўзига тегишли “Cобалт” русумли автомобилда ҳаракатланаётиб, пиёдалар ўтиш жойидан йўлни кесиб ўтаётган 2009 йилда туғилган пиёдани уриб юборган.
Ҳодиса оқибатида пиёда енгил тан жароҳати олган. Билдирилишича, ЙПХ ходими жабрланувчини биринчи тез тиббий ёрдам кўрсатиш мақсадида шифохонага олиб борган.
Расмий маълумотга кўра, ходим ҳодиса вақтида хизмат вазифасини бажараётган бўлган, ҳушёр ҳолатда бўлган ҳамда автомобиль бошқариш учун барча тегишли ҳужжатларга эга бўлган.
Мазкур ҳолат юзасидан Вобкент тумани прокуратураси томонидан терговга қадар текширув ўтказилмоқда.
Шунингдек, мутасаддилар ижтимоий тармоқларда ушбу ҳодиса “ёпди-ёпди қилинаётгани” ҳақида тарқалаётган хабарлар асоссиз эканини билдирган. Ёлғон хабар тарқатган фуқарога нисбатан қонунда белгиланган тартибда чора кўриш мақсадида суриштирув ишлари олиб борилаётгани айтилган.
