Саида Мирзиёева ҳолатини ўрганган оилавий поликлиника реконструкция қилинди
Мазкур бино аср давомида капитал таъмирланмаган. 16 та қишлоқ аҳолисига хизмат кўрсатиб келган.
1972 йилда қурилган Ургут туманининг “Баҳрин” маҳалласидаги 21-сонли оилавий поликлиника 16 та қишлоқ аҳолиси — 13 мингдан ортиқ фуқарога хизмат кўрсатиб келган. Мазкур бино узоқ йиллар давомида капитал таъмирланмаган.
Аввалги шароитларда бинода намлик, эскирган деразалар ва томдан сув ўтиши каби муаммолар мавжуд бўлган. Шунга қарамай, поликлиника ҳудуд аҳолиси учун ягона тиббий муассаса сифатида фаолият юритган.
2025 йил декабрь ойида Президент администрацияси раҳбари Саида Мирзиёева ушбу ҳолатни жойига чиқиб ўрганган.
Шундан сўнг поликлиника биноси тўлиқ реконструкция қилиниб, қўшимча корпус барпо этилди ҳамда 20 ўринли туғруқ бўлими ташкил этилди. Янгиланган муассасада аҳолига замонавий шароитларда тиббий хизмат кўрсатиш йўлга қўйилди.
Президент администрацияси раҳбари Самарқандга ташрифи чоғида янгиланган поликлиникага ташриф буюрди. Муассасада туғилган илк чақалоқ — Шавкатжонни кўрди.
Саида Мирзиёева буни амалга оширилаётган ишларнинг хайрли эканига ишора сифатида баҳолаганди.
