Ўзбекистондаги топ-блогерлар бир йилда 2,7 млрд сўм даромад олиб, 110 млн сўм солиқ тўлади
Блогерлар фаолияти таҳлил қилиниб, соҳанинг энг фаол 110 нафар вакили рўйхати шакллантирилди. 6 нафар топ-блогер фаолияти алоҳида ўрганилди.
Ўзбекистондаги 6 нафар топ-блогер 2025 йилда 2,7 миллиард сўм даромад олган ва бюджетга 110,4 миллион сўм солиқ тўлаган. Бу ҳақда Солиқ қўмитасида блогерлар билан ўтказилган учрашувда маълум қилинди.
Қўмита томонидан блогерлар фаолияти таҳлил қилиниб, соҳанинг энг фаол 110 нафар вакили рўйхати шакллантирилган. Ўрганишларга кўра, улардан 55 нафари ўзини ўзи банд қилган шахс, 33 нафари якка тартибдаги тадбиркор сифатида рўйхатдан ўтган. Қолган 22 нафар блогер эса жисмоний шахс мақомида фаолият юритмоқда.
Солиқ қўмитаси бу ҳолат блогерлар фаолиятининг ҳақиқий кўлами билан уларнинг ҳуқуқий мақоми ўртасида номутаносиблик мавжудлигини кўрсатишини қайд этди.
Шунингдек, 3 миллиондан ортиқ обуначига эга 6 нафар топ-блогер фаолияти алоҳида ўрганилган. Аниқланишича, улар 2025 йил давомида 360 та сторис ва 184 та реклама пости жойлаштирган.
Электрон ҳисобварақ-фактуралар асосидаги расмий ҳисоботларга кўра, мазкур блогерларнинг жами даромади 2,7 миллиард сўмни ташкил этган. Бюджетга эса 110,4 миллион сўм миқдорида солиқ тўланган.
Учрашув давомида блогерларга реклама даромадларини солиққа тортиш бўйича қонунчилик нормалари тушунтирилган. Хусусан, ўзини ўзи банд қилган шахс мақоми ходим ёллаш ҳуқуқини бермаслиги, бироқ айрим блогерлар администратор ва ёрдамчиларни жалб қилаётгани таъкидланган.
Томонлар соҳада солиқ мажбуриятларини тушунтириш ва ҳуқуқий саводхонликни оширишга қаратилган ўқув тадбирларини ташкил этиш таклифини ҳам муҳокама қилган.
