Сирдарёда меъёрдан ортиқ боғча болаларини олиб кетаётган Damas'лар аниқланди
Автомобилларнинг бирида 22 нафар, иккинчисида 24 нафар боғча боласи бўлган.
Сирдарё вилояти Мирзаобод туманида ўтказилган назорат-рейд тадбирларида боғча болаларини меъёрдан ортиқ ташиб кетаётган икки дона Damas автомобили аниқланиб, тўхтатилди. Бу ҳақда вилоят Йўл ҳаракати хавфсизлиги бошқармаси хабар берди.
Маълум қилинишича, ЙҲХБ ходимлари томонидан тўхтатилган автомобилларнинг бирида 22 нафар, иккинчисида эса 24 нафар боғча тарбияланувчиси олиб кетилаётган бўлган.
Текширув давомида ҳайдовчилардан бири аввал транспорт воситасини бошқариш ҳуқуқидан маҳрум этилганига қарамай, яна автомобиль бошқариб юргани аниқланган.
Ҳолат юзасидан хусусий мактабгача таълим ташкилоти масъуллари ҳамда ҳайдовчилар билан профилактик тушунтириш ишлари олиб борилган.
Шунингдек, ҳайдовчиларга нисбатан Маъмурий жавобгарлик тўғрисидаги кодекснинг 135-моддаси 2-қисми ҳамда 128−8-моддаси 1-қисми асосида маъмурий баённомалар расмийлаштирилган.
Қоидабузарлик содир этган автомобиллар вақтинча сақлаш учун жарима майдонига жойлаштирилган.
Эслатиб ўтамиз, аввалроқ Навоий вилоятида 14 нафар боғча боласини олиб кетаётган Matiz йўл-транспорт ҳодисасига учраганди. Автомобилни ҳайдовчилик гувоҳномасига эга бўлмаган оилавий боғча раҳбари бошқарган. Ҳодиса оқибатида аёл ҳалок бўлган, болалар эса турли тан жароҳатлари билан шифохонага ётқизилганди.
