Ўзбекистонда 3 ойда 63,6 трлн сўм солиқ тушуми қайд этилди
2026 йилнинг биринчи чорагида солиқ тушуми 2025 йилнинг мос даврига нисбатан 24 фоизга ошди.
Солиқ органлари томонидан 2026 йилнинг I чорагида республика бўйича бюджетга 63,6 трлн сўм тушумлар таъминланди. Бу ҳақда Солиқ қўмитаси хабар берди.
Маълум қилинишича, бу ўтган йилнинг мос даврига нисбатан 24 фоизга кўп.
Солиқ турлари кесимида энг катта тушум фойда солиғига тўғри келиб 20,4 трлн сўмни ташкил қилди. Ушбу турда 2025 йил мос даврига нисбатан 43 фоизлик ўсиш қайд этилди.
ҚҚС бўйича тушум 27 фоизга ошиб, 12,5 трлн сўм йиғилди. Жисмоний шахслардан олинадиган даромад солиғи 10,7 трлн сўмни ташкил этиб, 15 фоизга кўпайди. Ер қаъридан фойдаланганлик учун солиқ 6 трлн сўм бўлиб, 17 фоизга ошди.
Акциз солиғи 4,6 трлн сўмни (1%), айланмадан олинадиган солиқ 0,6 трлн сўмни (12%), сув ресурсларидан фойдаланганлик учун солиқ - 0,4 трлн сўмни (82%) ташкил қилди.
Ер солиғи 2,8 трлн сўмга (34%), мол-мулк солиғи 2,3 трлн сўмга (11%) етди.
Шунингдек, солиқсиз тушумлар, яъни дивиденд тўловлари, бож, йиғим, жарима ва бошқа тўловлар учун 3,3 трлн сўм (1%) йиғилди.
Аввалроқ 2026 йилнинг биринчи чорагида мамлакатда фаолият юритаётган 89 та хорижий IT ва рақамли сервис компанияси жами 65,7 миллиард сўм солиқ тўлагани ҳақида хабар берилганди.
