Россияда Ўзбекистондан олиб кирилган 20 тонна помидорда хавфли вирус аниқланди
Зарарланган маҳсулот партияси қайтарилиши ёки йўқ қилиниши мумкин.
Россиянинг Нижний Новгород вилоятида Ўзбекистондан олиб кирилган 20 тонна помидор партиясида хавфли фитовирус аниқлангани маълум қилинди.
Россельхознадзор ахборотига кўра, лаборатория текширувлари давомида помидорларда “помидор жигарранг ажин вируси” (Tomato brown rugose fruit virus — ToBRFV) қайд этилган. Ушбу вирус Tobamovirus гуруҳига мансуб бўлиб, помидор ва қалампир ҳосилига жиддий зарар етказиши мумкин.
Мутахассислар таъкидлашича, мазкур вирус қишлоқ хўжалиги экинлари орасида тез тарқалиш хусусиятига эга бўлиб, айрим ҳолларда ҳосилнинг 30–70 фоизигача йўқотилишига сабаб бўлиши мумкин.
Назорат қилувчи орган зарарланган маҳсулот партиясининг Россия ҳудудига киритилишига рухсат берилмаслигини билдирган. Амалдаги тартибларга мувофиқ, юк қайтарилиши ёки йўқ қилиниши мумкин.
