Эрон Можтабо Хоманаийнинг жароҳатлари ҳақида илк бор маълумот берди
АҚШ давлат раҳбарининг қиёфаси бузилгани даъво қилинди.
Эрон расмийлари мамлакатнинг олий раҳбари Мoжтабо Хоманаийнинг жароҳатлари тафсилотларини илк бор оммага ошкор қилди. Бу ҳақда Al Arabiya хабар берди.
Ҳукумат вакилларига кўра, 28 феврал куни Исроил ва АҚШ томонидан амалга оширилган ҳаво ҳужуми чоғида Мoжтабо Хоманаий зарба тўлқини оқибатида ерга йиқилган ва натижада тизза ҳамда бел қисмида жароҳатлар олган. Шунингдек, қулоқ орқасида енгил кесма ҳам қайд этилган.
Эрон расмийлари унинг белидаги жароҳат аллақачон тузалганини, тизза қисмидаги жароҳат эса тез орада соғайиши кутилayotganини маълум қилган. Қулоқ орқасидаги енгил жароҳат эса ташқи кўринишда сезилмас даражада экани билдирилган.
Олий Раҳбар девони вакиллари Можтабо Хоманаийнинг соғлиғи барқарор экани, у давлат ишлари ва тегишли жараёнларни назорат қилишда давом этаётганини таъкидлаган.
Шу билан бирга, АҚШ Мудофаа вазири Пит Хегсет Можтабо Хоманаийнинг “эҳтимол, қиёфаси бузилган” эканлигини айтган. У ўз баёнотини Мoжтабонинг видео ёки аудио ёзуви йўқлигини таъкидлаш билан изоҳлаган. “Менимча, сиз нима учунлигини биласиз”, деб қўшимча қилган АҚШ Мудофаа вазири. Ўз навбатида, АҚШ президенти Дональд Трамп Мoжтабо Хоманаийнинг ўлганлиги эҳтимолини истисно этмаган.
АҚШ томонидан билдирилган ушбу даъволар Эрон томонидан рад этилиб, расмий Теҳрон вакиллари олий раҳбарнинг ҳолати бўйича хавотирга асос йўқлигини қайд этган.
