Туркияда икки ўзбекистонлик аёлни ўлдирганликда айбланган шахсларга умрбод қамоқ жазоси сўралди

Туркиянинг Истанбул шаҳрида Сайёра Эргашалиева ва Дурдона Ҳакимованинг ваҳшийларча ўлдирилиши билан боғлиқ жиноят иши юзасидан тергов якунланди. Бу ҳақда DHA хабар берди.

 

Прокуратура қотилликда гумонланаётган Ўзбекистон фуқаролари — 31 ёшли Дилшод Турдимуротов ва 29 ёшли Ғофуржон Камолхўжаевга нисбатан оғирлаштирилган умрбод қамоқ жазоси тайинланишини талаб қилди.

 

Тергов материалларига кўра, воқеалар 2026 йил январь ойида Истанбулнинг Умрония туманидаги ижарада уйда содир бўлган.

 

32 ёшли Сайёра Эргашалиева 2025 йил декабрь ойида ишлаш мақсадида Ўзбекистондан Туркияга келган. 23 январдан кейин эса унинг яқинлари у билан боғлана олмаган. Орадан бир кун ўтиб, Истанбулнинг Шишли туманидаги чиқинди контейнеридан бошқа бир ўзбекистонлик аёл — Дурдона Ҳакимованинг бўлакланган жасади топилган.

 

Полиция кузатув камераларини текшириш давомида Дурдона яшаган уйга Сайёра кирганини, орадан кўп ўтмай эса Дилшод Турдимуротов ва Ғофуржон Камолхўжаев ҳам уйга кирганини аниқлаган. Эртаси куни олинган тасвирларда эса гумонланувчилар бир неча бор қора чиқинди қоплари билан уйдан чиқиб кетгани, кейинроқ эса оқ рангли жамадон олиб чиққани акс этган.

 

Терговчиларга кўра, гумонланувчилар таксида Фатиҳ туманига бориб, жасад қисмларини турли чиқинди контейнерларига ташлаган. Шундан кейин улар Еникапи Marmaray бекати томон йўл олган.

 

Сўроқ давомида маълум бўлишича, Дурдона Ҳакимова қотиллигидан аввал Сайёра Эргашалиева ҳам ўлдирилган. Гумонланувчиларнинг кўрсатмаларига кўра, улар Сайёрани аввал пичоқ билан ўлдириб, кейин жасадни бўлакларга ажратган.

 

Ғофуржон Камолхўжаев терговдаги кўрсатмасида қотиллик олдиндан режалаштирилганини айтган. Унинг сўзларига кўра, улар Сайёра ва Дурдонани “ор-номус масаласи” сабаб ўлдиришга қарор қилган.

 

Унинг айтишича, Сайёра Эргашалиева онасини ҳақорат қилгани сабабли улар ўртасида жанжал келиб чиққан. Камолхўжаев айнан шу можаро ортидан Дилшод Турдимуротов билан бирга қотилликни олдиндан режалаштирганини билдирган. Шу билан бирга, тергов материалларида улар ўртасида пул ва шахсий муносабатлар сабабли ҳам зиддиятлар бўлгани қайд этилган.

 

Камолхўжаевнинг айтишича, воқеа куни уйда фақат Сайёра бўлган. У билан жанжал келиб чиққач, Дилшод Турдимуротов Сайёрага бир неча марта пичоқ урган. Аёл воқеа жойида вафот этган.

 

Тергов материалларига кўра, гумонланувчилар дастлаб жасадни уйда қолдириб кетишни режалаштирган. Бироқ уйга бошқа одамлар келиб қолиши сабабли улар мурдани бўлакларга бўлишга қарор қилган. Тана қисмлари қора пакетларга жойлаштирилиб, кейинчалик Истанбулнинг турли ҳудудларидаги чиқинди контейнерларига ташланган.

 

Шунингдек, тергов давомида Дурдона Ҳакимова Сайёра Эргашалиеванинг телефонидан юборилган хабар орқали учрашувга чақирилгани аниқланган. 

 

Айбловга кўра, гумонланувчилар кейинчалик Дурдонани ҳам ўлдириб, жасадини бўлакларга ажратган.

 

Дилшод Турдимуротов эса кўрсатмасида қотилликни бевосита содир этмаганини билдирган. Унинг айтишича, у хонага кирганида Сайёра аллақачон қонга беланган ҳолда ётган бўлган, Ғофуржоннинг қўлида эса пичоқ бўлган. У воқеа вақтида гиёҳванд модда таъсирида бўлганини ҳам айтган.

 

Тергов маълумотларига кўра, икки гумонланувчи ижтимоий тармоқлардаги ўзбекистонликлар гуруҳлари орқали танишган ва бир муддат кийим-кечак ҳамда атир савдоси билан шуғулланган.

 

Туркия прокуратураси уларга нисбатан “қасддан ваҳшийларча одам ўлдириш” ҳамда “марҳумнинг ўлимидан фойдаланиб ўғрилик қилиш” моддаларини қўллаган. Агар айблов хулосаси суд томонидан тасдиқланса, гумонланувчилар Истанбул Онадолу Оғир жиноятлар судида жавоб беради.

 

Сайёра Эргашалиеванинг жасади ҳануз топилмаган.