Ўзбекистонда пахта ва буғдой етиштирувчиларга кредит фоизларининг бир қисми қоплаб берилади
Кредитларни ҳосил йилининг 31 декабрига қадар тўлиқ қайтарган хўжаликлар эса фоиз тўловининг 5 фоизлик пунктигача компенсация олади.
Ўзбекистонда 2026 йил ҳосилидан бошлаб фермер хўжаликларини қўллаб-қувватлашнинг янги механизмлари жорий этилади. Бу президентнинг 8 май куни имзоланган “Пахта ва буғдой етиштирувчиларни молиявий қўллаб-қувватлашнинг қўшимча чора-тадбирлари тўғрисида”ги фармонида белгиланган.
Фармонга кўра, пахта ва буғдой етиштирувчиларга ажратиладиган имтиёзли кредитлар фоизларининг бир қисми давлат томонидан компенсация қилинади.
Шунингдек, дизель ёнилғиси харажатларини қоплаш учун субсидия ажратиш тартиби йўлга қўйилади. Жумладан, пахта хомашёси етиштириш учун олинган имтиёзли кредитларни шартномада белгиланган муддатда қайтарган хўжаликларга фоиз тўловининг 2,5 фоизлик пункти қоплаб берилади.
Кредитларни ҳосил йилининг 31 декабрига қадар тўлиқ қайтарган хўжаликлар эса фоиз тўловининг 5 фоизлик пунктигача компенсация олади.
Шунингдек,буғдой етиштириш харажатлари учун ажратилган имтиёзли кредитларни ҳосил йилининг 1 августига қадар тўлиқ қайтарган хўжаликларга фоиз тўловининг 4 фоизлик пункти қоплаб берилади.
Фармонга мувофиқ, пахта хомашёсини харид қилиш учун пахта-тўқимачилик кластерлари ҳамда пахта хомашёсини қайта ишлаш ва ип-калава ишлаб чиқариш занжирига эга корхоналарга ажратилган тижорат кредитлари бўйича ҳам фоиз харажатларининг бир қисми компенсация қилинади.
Бунда кредит ставкасининг 8 фоиз пунктидан юқори, бироқ 16 фоиз пунктидан ошмаган қисми қоплаб берилиши белгиланган.
Абдуллаева Шахризода
