Қозоғистонда ўзбеклардан пул талаб қилган шахслар ушланди
Айни пайтда иш бўйича зарур тергов ҳаракатлари олиб борилаётгани билдирилди.
Қозоғистоннинг Туркистон вилоятида жойлашган “Қоплонбек” чегара ўтказиш пунктида фуқароларни қўрқитиб, улардан пул талаб қилган шахс қўлга олинди. Бу ҳақда Туркистон вилояти Полиция департаменти маълум қилди.
Аввалроқ номаълум шахслар Қозоғистон ҳудудида ўзбекистонлик ҳайдовчилардан турли баҳоналар билан пул талаб қилишга уринаётгани ҳақида хабар берилганди.
Идора маълумотига кўра, Сариағаш туманидаги мазкур ўтказиш пункти ҳудудида содир этилган ноқонуний ҳаракатлар юзасидан жиноят иши қўзғатилган. Гумонланувчи сифатида Туркистон вилоятининг 43 ёшли, ишсиз ва доимий яшаш жойига эга бўлмаган фуқароси ушланган.
Тергов маълумотларига кўра, у олти қиррали бурагич (“отвёртка”) билан таҳдид қилиб, Ўзбекистондан ўтган шахслардан “улуш” талаб қилган.
Ҳозирда гумонланувчи Сариағаш тумани полиция бошқармасининг вақтинчалик сақлаш ҳибсхонасига жойлаштирилган. Ҳодиса қачон содир бўлганига аниқлик киритилмаган.
Полиция департаменти айни пайтда иш бўйича зарур тергов ҳаракатлари олиб борилаётганини билдирди. Шунингдек, ҳар қандай ноқонуний хатти-ҳаракат Қозоғистон қонунчилигига мувофиқ жавобгарликка сабаб бўлиши эслатилди.
