Фарғонада вояга етмаган қизга никоҳ ўқиган имом ноиби жиноий жазога тортилди
Учкўприк туманидаги жоме масжидларнинг бирида ишлаган шахс “ZAGS”дан ўтмаган, 2008 йилда туғилган қизга никоҳ ўқиди. “Никоҳ ёшига тўлмаганим сабабли ФҲДЁ органи қонуний никоҳ тузишни рад этди, бу вақтда оила аъзоларим тўй қилишга келишиб, кунини ҳам белгилаб бўлганди”- деган қиз судда.
Фарғонада имом ноиби никоҳи қонуний қайд этилмаган шахслар ўртасида диний маросим ўтказгани учун жазоланди. Zamon.uz суд ҳужжати билан танишди.
Суд ҳукмида келтирилишича, 1991 йилда туғилган О.В. Учкўприк тумани Қақир қишлоғидаги жоме масжидда имом ноиби бўлиб ишлаган(2017-2025 йиллар). У 2025 йил 21 ноябр куни 30 ёшли ҳамқишлоқдоши(куёв) А.М. ва 17 ёшли З.Б.га шаръий никоҳ ўқиган.
“Улар илтимос қилгани учун никоҳ ўқишга рози бўлдим. Ҳужжати йўқлигини билиб, 400 минг сўм эвазига никоҳ тузишга доир диний маросимни гувоҳларнинг иштирокида амалга оширдим. Ҳозирда қилган ишимнинг оқибатини тушундим, чин кўнгилдан пушаймонман, муқаддам судланмаганимни инобатга олиб, енгилроқ жазо тайинлашингизни сўрайман”- деган у суддаги кўрсатмасида.
Бундан ташқари, судда А.М. гувоҳлик бериб, имом ноиби никоҳни тўй куни белгилангани учун ўқиганини айтди.
“2025 йил 22 ноябр куни турмуш қурдик. Ундан олдин З.Б. никоҳ ёшига тўлмаганлиги сабабли ФҲДЁ органи қонуний никоҳ тузишни рад этди, бу вақтда оила аъзоларим тўй қилишга келишиб кунини ҳам белгилаб қўйишганди, 21 ноябр куни гувоҳлар билан шаръий никоҳ ўқитиш учун Учкўприк тумани(……)қишлоғида яшовчи О.В.ни яшаш хонадонига бордик. Дастлаб, у З.Б. 2008 йилда туғилганлигини, никоҳ ёшига етмаганлигини билиб, шаръий никоҳ ўқимаслигини айтди, шунда унга эртаси куни тўй эканлигини айтганимдан кейин рози бўлди”- деган у.
З.Б. ҳам буларни тасдиқлаб, ҳолат юзасидан ҳеч кимга даъвоси йўқлигини билдирди.
2026 йил 9 апрел куни ЖИБ Учкўприк туман суди ишни кўриб чиқиб, О.В.ни Жиноят кодексининг 1251-моддаси(никоҳ ёши тўғрисидаги қонунчиликни ёки никоҳ тузиш тартибини бузиш) 3-қисмида назарда тутилган жиноятни содир этганликда айбдор деб топди ва унга шу модда билан базавий ҳисоблаш миқдорининг 80 баравари, яъни 32 млн 960 минг сўм жарима жазоси тайинлади.
Қайд этилишича, О.В. илгари никоҳи қонуний бўлмаган шахслар ўртасида диний маросим ўтказгани учун МЖтКнинг 473-моддаси(никоҳ ёши тўғрисидаги қонунчиликни ёки никоҳ тузиш тартибини бузиш) 3-қисми билан 3 млн 750 минг сўм жаримага тортилган.
Муаллиф: Шаҳзод Ўроқбоев
