Францияда она ва икки фарзандлари мактабга бостириб кириб, ўқувчиларга ҳужум қилди
Уларнинг автомобилидан бир нечта қурол, бир нечта пичоқ ва кўздан ёш оқизувчи газ баллончаси топилган.
Франциянинг Тулуза шаҳридаги мактаблардан бирида она ва унинг икки фарзанди иштирокида содир бўлган қуролли ҳужум юзасидан тергов бошланди. Le Figaro хабарига кўра, улар пичоқлар билан таълим муассасасига бостириб кириб, ўқувчиларга ҳужум қилган.
Дастлабки маълумотларга кўра, воқеа мактаб назоратчиси ва ўқувчилардан бири ўртасидаги жанжалдан сўнг юзага келган. Ўсмир оиласига қўнғироқ қилганидан кейин бир неча дақиқа ичида унинг қариндошлари мактабга келган.
Гувоҳларнинг айтишича, аёл вазиятни тинчлантириш ўрнига можаронинг янада кескинлашишига сабаб бўлган. Шундан сўнг уч киши мактаб ҳудудига кириб, назоратчи ҳамда икки нафар вояга етмаган қизга ҳужум қилган.
Ҳодиса юзасидан ҳуқуқ-тартибот органлари томонидан тезкор чоралар кўрилган ва гумонланувчилар қўлга олинган. Улар гуруҳ бўлиб қурол билан таълим муассасасига бостириб кириш ҳамда зўравонлик содир этишда айбланмоқда.
Тулуза прокуратураси мазкур ҳолат бўйича қотилликка уриниш моддаси билан тергов ҳаракатлари бошланганини маълум қилган. Полиция гумонланувчиларнинг автомобилидан бир нечта пичоқ, қассоб пичоғи, кўздан ёш оқизувчи газ баллончаси ҳамда сохта тўппонча топган.
Расмий маълумотларга кўра, жабрланганлар енгил тан жароҳатлари олган. Шу билан бирга, ҳодисанинг ўқувчилар ва мактаб ходимларига жиддий психологик таъсир кўрсатгани қайд этилмоқда.
Воқеадан сўнг ўқувчилар уйларига жўнатилган. Тулуза таълим бошқармаси барча хизматлар хавфсизликни таъминлаш учун сафарбар қилинганини билдирган. Мактабда психологик ёрдам маркази ташкил этилиши режалаштирилмоқда.
Эслатиб ўтамиз, 15 апрель куни Туркиянинг жануби-шарқидаги Қаҳраманмараш вилоятидаги мактабда юз берган отишмада тўққиз киши ҳалок бўлган ва 21 киши жароҳатланган эди. 14 апрель куни Шанлиурфа вилоятидаги мактабда ўн тўққиз киши жароҳат олгани хабар қилинган эди.
