Хоразмда МИБ ходими 1,5 минг доллар пора билан ушланди
У фуқаронинг солиқ қарздорлигини бартараф қилиб бермоқчи бўлган.
Хоразм вилоятининг Хива туманида Мажбурий ижро бюроси ходимига нисбатан жиноят иши қўзғатилди. Бу ҳақда Давлат хавфсизлик хизмати хабар берди.
Маълум қилинишича, МИБнинг Хива туман бўлими давлат ижрочиси хизмат мавқеидан фойдаланиб, бўлим иш юритувидаги ижро иши бўйича фуқаронинг солиқ қарздорлигини бартараф қилиб беришни ваъда қилган.
У 1995 йилда туғилган фуқаронинг ундирилиши лозим бўлган 4 млн 526 минг сўм солиқ қарздорлигини, шунингдек, фуқаро ва унинг отасига ҳисобланган жами 22 млн 822 минг сўмлик ер ҳамда мол-мулк солиқларини мансабдор танишлари орқали ҳал қилиб бериш эвазига 1500 АҚШ доллари олган вақтида ашёвий далиллар билан қўлга олинган.
Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.
