Тошкентда нарколаборатория аниқланди
Манзилдан “Прегабалин”, “Тропикамид”, 16 кг “Трилон-Б” каби воситалар, прекурсорлар, катта миқдордаги капсула ва флаконлар олинди.
Чилонзорда нарколаборатория ташкил қилган шахс қўлга олинди. Бу ҳақда ДХХ хабар берди.
Маълум қилинишича, Тошкент шаҳрида ўтказилган тезкор тадбирда 1996 йилда туғилган шахс бошқарувидаги “Спарк” автомашинаси Чилонзор туманида тўхтатилиб, текширилди.
Натижада унинг салонида 15 дона капсулада “Прегабалин” кучли таъсир қилувчи моддаси борлиги маълум бўлди.
Сўнгра, тезкор тадбир давом эттирилиб, ушбу дориларни сотган 1991 йилда туғилган фуқаро ҳам қўлга олинди.
Аниқланишича, мазкур фуқаро Чилонзор туманидаги хонадонда нарколаборатория ташкил қилган бўлиб, ушбу манзилдан 955 гр ва 538 дона “Прегабалин”, 227 гр ва 28 дона “Тропикамид”, 16 кг “Трилон-Б” ҳамда синтетик наркотиклар тайёрлашда фойдаланиладиган прекурсорлар, катта миқдордаги капсула ва флаконлар олинди.
Ҳозирда ушбу шахсларга нисбатан жиноят иши қўзғатилиб, тергов ҳаракатлари олиб борилмоқда.
