Афғонистонда энди 9 ёшли қизларга турмушга чиқишига рухсат берилди
Толибон раҳбарияти аёллар ҳуқуқлари “Ислом шариати асосида ҳимоя қилинаётганини” таъкидлаган.
Толибон ҳаракати қизлар учун минимал никоҳ ёшига оид чекловни бекор қилди. Бу ҳақда Тhe Тimes нашри хабар берди.
Афғонистонлик инсон ҳуқуқлари фаоли Хория Мосадиқнинг маълум қилишича, янги тартибга кўра, агар қиз 9 ёки 10 ёшида балоғатга етган деб ҳисобланадиган бўлса, у никоҳ ёшига етган сифатида қаралади.
Толибон ҳокимият тепасига келишидан аввал мамлакат қонунчилигида қизлар учун минимал никоҳ ёши 16 ёш этиб белгиланган эди. Аввалроқ, Толибон етакчиси томонидан “Турмуш ўртоқларни ажратиш тамойиллари” деб номланган 31 моддадан иборат ҳужжат тасдиқлангани, унда қизлар 12 ёшида турмушга чиқишлари мумкин ва бундай никоҳни бекор қилиш деярли имконсизлиги маълум қилинган эди.
Халқаро нашрлар айрим сунний ислом ҳуқуқи мактабларида балоғат ёши 9 ёш деб талқин қилинишини ҳам қайд этмоқда.
Толибоннинг олий раҳбари Ҳайбатуллоҳ Охундзода аввалроқ ҳаракат афғон аёлларини “анъанавий зулм”дан озод қилгани ва уларнинг ҳуқуқлари “Ислом шариати асосида ҳимоя қилинаётгани”ни таъкидлаган эди. У, шунингдек, аёллар билан боғлиқ муаммоларни мамлакатдаги 20 йиллик хорижий ҳарбий иштирок оқибатлари билан изоҳлаган.
