Лионел Месси миллиардерлар рўйхатига киритилди — Bloomberg
Футболчининг бойлиги 1 миллиард доллардан ошгани маълум қилинди.
Bloomberg нашри аргентиналик футболчи Лионел Мессини миллиардерлар рўйхатига киритди. Шу тариқа, саккиз карра “Олтин тўп” соҳиби, “Интер Маями” клуби ва Аргентина терма жамоаси ҳужумчиси Лионел Месси расмий равишда миллиард доллардан ортиқ бойликка эга спортчилар сафидан жой олди.
Маълумотларга кўра, 2007 йилдан буён профессионал фаолият юритиб келаётган 38 ёшли футболчи иш ҳақи, бонуслар ва тижорий шартномалар ҳисобидан қарийб 700 миллион доллар даромад олган. Натижада унинг умумий бойлиги 1 миллиард доллардан ошган.
Шу билан Месси Bloomberg Billionaires Index рейтингида миллиардер футболчилар орасида иккинчи ўринни эгаллаган. Аввалроқ Саудия Арабистонининг «Ал-Наср» клуби ва Португалия терма жамоаси ҳужумчиси Криштиану Роналду ҳам ушбу рўйхатга киритилган эди.
Месси 2023 йилдан буён АҚШнинг “Интер Маями” клубида тўп сурмоқда. У футбол тарихидаги энг кўп соврин ютган ўйинчилардан бири бўлиб, 46 та совринга эга. Унинг ютуқлари орасида 2022 йилги Жаҳон чемпионати ғалабаси, «Барселона» билан Чемпионлар Лигаси ва Испания чемпионати совринлари, шунингдек «ПСЖ» сафидаги Франция чемпионликлари мавжуд.
